2 Chronicles 18
1 猶大王約沙法盡有財富㧯名聲，佢㧯以色列王亞哈結親。
2 幾年後，約沙法去撒馬利亞拜訪亞哈；亞哈為到招待約沙法㧯佢个隨從㓾盡多牛羊，擺設筵席，想愛說服約沙法㧯佢共下去攻打基列个拉末城。
3 以色列王亞哈問猶大王約沙法：「你肯㧯𠊎共下去攻打基列个拉末麼？」約沙法應講：「你个事就係𠊎个事。𠊎个軍隊就係你个軍隊；𠊎等一定㧯你共下去相㓾。」
4 約沙法又講：「總係，你愛先求問上主。」
5 所以，以色列王召集大約四百名先知來，問佢等：「𠊎做得去攻打基列个拉末麼？」佢等講：「做你去！上帝會使王得勝。」
6 總係約沙法問：「這位敢毋係還有上主个先知？𠊎等做得請佢求問上主。」
7 以色列王對約沙法講：「還有一個，係音拉个孻仔米該雅，𠊎等做得通過佢求問上主。毋過𠊎當惱佢，因為佢從來毋識對𠊎預言講一句好話，總係預言講災禍个話。」約沙法講：「王毋好恁樣講！」
8 所以，以色列王喊一個宮廷官員來，命令佢黏時去將音拉个孻仔米該雅尋來。
9 以色列王亞哈㧯猶大王約沙法著等王袍，在撒馬利亞城門外打麥場該位，坐在自家个寶座頂；所有个先知在佢等面前受感入神講預言。
10 其中有一個先知係基拿拿个孻仔西底家；佢打兜鐵角，對亞哈講：「上主恁樣講：『你愛用這兜鐵角打敘利亞人，徹底消滅佢等。』」
11 其他个先知也全部恁樣預言講：「做你去攻打基列个拉末，你一定會贏；上主會將該城交在王个手中。」
12 這時，該去喊米該雅來个官員對米該雅講：「所有个先知全部講王會成功，你最好也恁樣講。」
13 總係米該雅講：「𠊎指等永生个上主發誓，上帝愛𠊎講麼介，𠊎就講麼介。」
14 米該雅到亞哈王面前个時，王問佢：「米該雅，𠊎等做得去攻打基列个拉末麼？」米該雅應講：「做你等去打啊！你等一定會打贏；敵人會交在你等个手中！」
15 總係王對佢講：「你愛奉上主个名照實對𠊎講！這句話𠊎愛㧯你講幾多擺呢？」
16 米該雅講：「𠊎看到以色列个軍隊散在山岡頂，就像無牧人个羊群。上主講：『這兜人無領袖，喊佢等平平安安轉屋下去！』」
17 以色列王對約沙法講：「𠊎敢毋係講過，佢從來毋識對𠊎預言講一句好話？總係預言講災禍个話！」
18 米該雅繼續講：「好！你等愛聽上主个話！𠊎看到上主坐在天庭个寶座，所有个天使企在佢个塍頭。
19 上主問：『麼人去騙以色列王亞哈，俾佢到基列个拉末去送死呢？』該兜天使一儕講一樣。
20 後來，有一個靈到上主頭前來講：『𠊎去騙佢。』上主問：『你愛樣般騙呢？』
21 該靈講：『𠊎會使亞哈所有个先知講花撩。』上主講：『好！你去騙佢！你一定會成功。』」
22 最後米該雅講：「這就係事情个經過。上主使你个先知對你講花撩，上主已經命定你堵到災禍！」
23 基拿拿个孻仔西底家先知行到米該雅面前，打佢个嘴角，責問佢：「上主个靈麼介時節離開𠊎，㧯你講話呢？」
24 米該雅應講：「等到你走去最底背个細房間囥起來，該日你就會知了。」
25 然後，以色列王命令講：「將米該雅捉起來，送到市長亞們㧯王子約阿施該位，
26 吩咐佢等將米該雅關在監獄肚，逐日單淨給佢維持生命个餅㧯水，等到𠊎平安轉來。」
27 米該雅講：「若係你還平安轉來，這就證明上主無通過𠊎講話！」佢又講：「各位，愛記得𠊎頭下所講个話！」
28 以色列王亞哈㧯猶大王約沙法去基列攻打拉末城。
29 以色列王對約沙法講：「𠊎等上戰場个時，𠊎來改裝，你還係著等王袍。」所以以色列王改裝去相㓾。
30 敘利亞王命令厥該兜戰車个指揮官，愛專門打以色列王一儕。
31 所以當佢等看到約沙法个時，恅到佢就係以色列王，就全部去攻打佢。約沙法大聲喊，上主就來救佢；上帝使攻打佢个人轉身離開。
32 戰車个指揮官認出佢毋係以色列王就無繼續去逐佢。
33 總係，有一個敘利亞士兵隨便射一箭，堵好射到以色列王亞哈戰甲个接縫。亞哈對駛車个喊講：「𠊎著重傷了，倒轉去，退出戰場！」
34 該時，戰爭越來越厲害，以色列王忍耐企在戰車肚，面對敘利亞人，直到臨暗。日頭落山个時，佢就死掉。